ഞാന് ഏതെങ്കിലും രാഷ്ട്രീയ പാര്ട്ടിയുടെ മെമ്പറോ സഹയാത്രികനോ അല്ല. തിരഞ്ഞെടുപ്പ് കാലത്തോ അല്ലാതെയോ ഇത്തരത്തിലുള്ള വിഷയങ്ങളുടെ പൊതുചര്ച്ചകളില് പങ്കെടുത്തിട്ടില്ല. എന്നിട്ടും ഇപ്പോള് കോൺഗ്രസ് കൈവരിച്ച "നേട്ടത്തെ" ഭീതിയോടെ കാണുന്നു, അതേക്കുറിച്ച് നാം പ്രബുദ്ധരായിരിക്കണം എന്ന് വിചാരിക്കുകയും ചെയ്യുന്നു, കാരണം പറയാം.
നിലവില് നേമത്ത് വര്ഗീയ ഫാഷിസത്തിന്റെ താമര യൂഡിയെഫ് വിടര്ത്തിയത് ഒരു ചാണക്യസൂത്രമാണ്. അന്താരാഷ്ട്രതലത്തില് ഇസ്ലാമോഫോബിയ പരത്തി തന്റെ അധികാരമുറപ്പിക്കാനുള്ള യാങ്കിയുടെ തന്ത്രം അവര് കടമെടുക്കുന്നു. ആളും അര്ത്ഥവും ആയുധവും കൊടുത്ത് ആഭ്യന്തര കലഹങ്ങള് ഉണ്ടാക്കുന്ന ചെറിയ സംഘടനകളെ സൃഷ്ടിച്ചു ഇസ്ലാമിക രാജ്യങ്ങളിലെ ഭരണ സ്ഥിരത തകര്ക്കുകയും പിന്നീട് അതേ ഭരണകൂടങ്ങളെ ഉപയോഗിച്ച് "ഭീകരതക്കെതിരായ" പോരാട്ടം നയിക്കുകയും ചെയ്യുന്ന യാങ്കി തന്ത്രത്തിന്റെ ആവര്ത്തനമാണിത്.
കേരളത്തില് ഇത്രകാലം വര്ഗീയ ഫാഷിസം ക്ലച് പിടിക്കാതിരുന്നതിന്റെ ഏറ്റവും ശരിയായ ഉത്തരം ഇടതുപക്ഷത്തിന്റെ സാന്നിധ്യമാണെന്ന് എല്ലാവര്ക്കും അറിയാം. എന്നാല് ദേശീയ തലത്തില് അതിന്റെ ശേഷി പഴയപോലെ ഇല്ല. ഫാഷിസം വളരുമ്പോള് അതിനൊത്തു ഒരു മൂന്നാം മുന്നണിയുടെ ഉയര്ച്ച നാം പ്രതീക്ഷിച്ച പ്രകാരം ഉണ്ടായില്ല. ആ സാധ്യത ഏറ്റവും നന്നായി അനുകൂലമായിട്ടുള്ളത് കോൺഗ്രസിനാണ്. പക്ഷെ, അതു വളര്ത്താന് അവര് സ്വീകരിച്ച അടവുകള് നൃശംസനീയമാണ്. സ്വന്തം വോട്ടുബാങ്ക് കുതിരക്കച്ചവടം നടത്തി സങ്കിയെ വളര്ത്തുക. എന്നിട്ട്, അവനെ ചൂണ്ടിക്കാട്ടി ഇതാ സങ്കി വളരുന്നു എന്ന ഭീതി വളര്ത്തി കാലുറപ്പിക്കുക!! ഇതല്ലെങ്കില് പിന്നെന്താണ് ചാണക്യസൂത്രം!!
ബ്രിട്ടീഷുകാരന്റെ ഭിന്നിപ്പിച്ചു ഭരിക്കുക എന്ന തന്ത്രത്തിന്റെ ഉപോത്പന്നങ്ങളായിരുന്നു സവര്ക്കറുടെ "ഹിന്ദുത്വ"യും ജിന്നയുടെ "മുസ്ലിംലീഗും" എന്ന് വിലയിരുത്തപ്പെട്ടിട്ടുണ്ട്. എന്നാല്, കോൺഗ്രസ് ബ്രിട്ടീഷുകാരുടെ നേരിട്ടുള്ള നേതൃത്വത്തിലും നിയന്ത്രണത്തിലും രൂപീകരിക്കപ്പെട്ട പാര്ട്ടിയാണ്. ഇന്ത്യയിലെ വൈസ്രോയ് ആയിരുന്ന ഡഫറിൻ പ്രഭുവിന്റെ അനുമതിയോടെയും പിന്തുണയോടെയും സ്കോട്ട്ലൻഡുകാരനായ അലൻ ഒക്ടേവിയൻ ഹ്യൂം മുൻകയ്യെടുത്താണ് 1885-ൽ ഇന്ത്യൻ നാഷണൽ കോൺഗ്രസ് സ്ഥാപിച്ചത്. 1860-ൽ സിറിയയില് ക്രിസ്ത്യാനികളെ കൂട്ടക്കൊല ചെയ്തതിനെ തുടർന്നുണ്ടായ അനുരഞ്ജനശ്രമങ്ങളിൽ ബ്രിട്ടനെ പ്രതിനിധീകരിച്ചു ക്രൈസ്തവതാത്പര്യം സൂക്ഷിക്കുന്നതിൽ തനിക്കുള്ള പ്രതിബദ്ധത തെളിയിച്ചയാളാണ് ഡഫറിൻ പ്രഭു. ഇന്ത്യയിലെ ബ്രിട്ടീഷ് ഭരണതലത്തിൽ അഭ്യസ്തവിദ്യരായ ഇന്ത്യക്കാരുടെ പങ്കാളിത്തം ഉറപ്പാക്കുക എന്ന ലക്ഷ്യത്തോടെയാണ് ഇന്ത്യൻ നാഷണൽ കോൺഗ്രസ് രൂപം കൊണ്ടത്. തങ്ങള് തന്നെ സൃഷ്ടിച്ച ഹിന്ദു മുസ്ലിം വര്ഗീയ സംഘര്ഷങ്ങളില് തങ്ങള്ക്കു പങ്കില്ലെന്ന് വരുത്തുക കൂടിയായിരുന്നു ക്രൈസ്തവ യൂറോപ്പിന്റെ ലക്ഷ്യം. ഇപ്പോളും കോൺഗ്രസ് അതേ ചിറ്റമ്മനയം തുടരുന്നു. വിത്ത്ഗുണം പത്തുഗുണം.
ഈ തിരഞ്ഞെടുപ്പില് ഒലിച്ചുപോകുമെന്നു കോൺഗ്രസിനറിയാമായിരുന്നു, അത്രയ്ക്കുണ്ടല്ലോ അഴിമതിയുടെ വീരഗാഥകള്! എന്നാല് നട്ടുച്ചയ്ക്ക് നട്ടപ്പതിരയാണെന്നു പറഞ്ഞാലും വിശ്വസിക്കുന്ന അണികളുള്ള ലീഗ് എങ്ങനെയും നിയമസഭയില് എത്തും. അവര്ക്കൊരു "കൈ"ത്താങ്ങ് കൊടുത്താല് "ഐക്യമുന്നണിയുടെ" ബലത്തില് പ്രതിപക്ഷത്തെങ്കിലും ഇരിക്കാമല്ലോ. ചുരുക്കത്തില് ലീഗ് ജയിച്ചാലും ഫാഷിസ്റ്റുകള് ജയിച്ചാലും നേട്ടം വൈസ്രോയിയുടെ പാര്ട്ടിക്ക് തന്നെ!! ഇതാണ് കോൺഗ്രസ് രാഷ്ട്രീയം.
posted on may 21,2016
