അറിഞ്ഞിടത്തോളം വസ്തുതകള്‍ ചേര്‍ത്ത് വായിക്കുമ്പോള്‍ മനസിലാകുന്നത് കേരള നിയമസഭയില്‍ താമര വിരിഞ്ഞത് യൂഡിയെഫിന്‍റെ ചിലവില്‍ ആണെന്നാണ്‌. മണ്ണാര്‍ക്കാട്ട് പച്ച വിരിക്കാന്‍ ഇത‌ഃപര്യന്തം കാത്തു സൂക്ഷിച്ച മതേതരത്വത്തിനു മീതെ കാവി പുതപ്പിച്ച നടപടി ആശങ്കാജനകമാണ്. കോണ്ഗ്രസിന്‍റെ മൃദുല ഹിന്ദുത്വ സമീപനമാണ് ദേശീയ തലത്തില്‍ തന്നെ വര്‍ഗീയ ഫാഷിസത്തിന്‍റെ വളര്‍ച്ചക്ക് കാരണമായത് എന്ന് അനേകം പഠനങ്ങള്‍ ചൂണ്ടിക്കാണിച്ചിട്ടുണ്ട്.
ഞങ്ങള്‍ ഹിന്ദുവിനെയല്ല, ഹിന്ദുത്വയെ ആണു വെറുക്കുന്നത്. നിഷ്കളങ്കരായ ഹിന്ദുക്കളുടെ മതവികാരം ഊതിക്കാച്ചി വര്‍ഗീയത വളര്‍ത്തുന്നത് ഹിന്ദുത്വയാണ്. അതിനു ബദല്‍ ആയി ഉയര്‍ന്നു വരാനുള്ള സാധ്യതയും ബാധ്യതയും കോണ്ഗ്രസിനുണ്ട്. ആ തിരിച്ചറിവിലേക്ക് അവര്‍ വളരണം. വര്‍ഗീയത ന്യൂനപക്ഷത്തിന്‍റെതായാലും ഭൂരിപക്ഷത്തിന്‍റെതായാലും വിഷമാണ്. അതിനാല്‍ കാവിഫാഷിസത്തെയും ഹരിതഫാഷിസത്തെയും ഒരുപോലെ ചെറുക്കുക. ജനാധിപത്യത്തില്‍ വിശ്വസിക്കുന്നവരുടെ ധാര്‍മിക ബാധ്യതയാണത്
0 comments:
Post a Comment