ആരോടും പറയാത്ത സ്വകാര്യം!

Sajeer Bukhari

15/6/2016 



തിരുനബി സ്വ.യുടെ ശിഷ്യനായിരുന്ന അനസ് (റ)വിനെ കൂട്ടുകാരനായ സാബിത് അനുസ്മരിക്കുന്നു:
അനസ് പറഞ്ഞു: കുട്ടികളോടൊപ്പം കളിച്ചുകൊണ്ടിരിക്കുകയായിരുന്നു ഞാന്‍. അപ്പോ­ള്‍ തിരുമേനി അതുവഴി വന്നു, സലാം പറഞ്ഞു. പിന്നെ എന്നെ വിളിച്ചു
ചില സംഗതികള്‍ക്കായി ഒരിടത്തേക്കയച്ചു. അതിനാല്‍, ഉമ്മയുടെ അടുത്ത് തിരിച്ചെത്താന്‍ വൈകി.
ഉമ്മ ചോദിച്ചു; എന്താ വൈകിയത്?
“തിരുമേനി സ്വ. ചില സംഗതികളേല്‍പ്പിച്ചു വിട്ടതായിരുന്നു”
“എന്തു സംഗതി?”
“അതൊരു സ്വകാര്യമാണ്”
ഉടനെ ഉമ്മ: “തിരുനബിയുടെ സ്വകാര്യങ്ങള്‍ ഒരാളോടും പറയരുത്”.
അനസ് പറഞ്ഞു: “അല്ലാഹുവാണേ! ആരോടെങ്കിലും പറയുമായിരുന്നെങ്കില്‍ ഞാനത് നിന്നോടു പറയുമായിരുന്നു, സാബിത്തേ!”
(- മുസ്‌ലിം 2482)
വിശ്വസ്തത (അമാനത്) യാണ് ഏറ്റവും വലിയ വ്യക്തിഗുണം. മുത്തു നബി പ്രവാചകത്വത്തിനു മുമ്പേ "അൽഅമീൻ" ആയിരുന്നു - സ്വല്ലല്ലാഹു അലയ്ഹി വസല്ലം!